Я неяк зьвяртаў Вашу ўвагу на праблему беларусізацыі мабільных тэлефонаў. Хачу працягнуць гэтую гаворку. Тое-сёе зроблена за апошні час, але, на вялікі жаль, слухаўкі з магчымасьцю выбару мэню на Нашай мове так покуль і не зьявіліся.

Але па–парадку – 11.08.2008г. мне прыйшоў ліст з Мінсувязі за подпісам намесьніка міністра Н.М. Струкава са словамі: “…за последнее полугодие проведены переговоры с известными производителями сотовых телефонов Nokia, Sony Ericsson, Samsung. Одним из вопросов обсуждаемых на переговорах был вопрос выбора меню на белорусском языке. Представители компаний заявляли, что в Республике Беларусь два государственных языка русский и белорусский и доработка программного обеспечения потребует дополнительного времени и средств, что в дальнейшем отразится на стоимости сотового телефона в целом. Однако по просьбе белорусской стороны обещали ещё раз проработать данный вопрос и информировать Министерство связи и информатизации.”

Як бачым, замежнікі, як і нашы чыноўнікі, спасылаюцца ў сваёй ляноце на тое ж ганебнае дзьвюхмоўе! Але Мінсувязі ўсё ж “паварушыла кляшнёю” тут. Хоць нешта! (гэта, праўда, пасьля доўгіх перыпітыяў - куды я, напрыклад, толькі не зьвяртаўся!? – хіба, можа, толькі ў мясцовы парлямэнт, але, як вядома, ён вырашае толькі “як пісаць на прыбіральнях – эМ і Жэ ці Мэ і Жо”, - па выразу з песьні Лявона Вольскага!). У мяне самога ёсьць яшчэ пару думак, дасьць Бог, выканаю. Думаю яшчэ сотку подпісаў сабраць..! Ведаю, група беларускаарыентаванай моладзі ладзяць кампанію па беларусізацыі саміх паслуг “Velcom” і “МТС” (у “Беста” ўжо ёсьць галасавыя паведамленьні на беларускай мове).

Вячаслаў Кучук